Fréttir

Sacred Arias með Jóhanni Friðgeiri kemur út 15. nóvember

Skráð þann 13. nóvember 2010 kl. 23:05
„Ég valdi verkin með það í huga að platan höfðaði til fólks sem nýtur þess að hlusta á fallega og angurværa tónlist" segir Jóhann Friðgeir. „Platan er mjög aðgengileg og þar ættu allir að finna eitthvað við sitt hæfi" segir hann, og bætir við að jafnvel finni fólk þar eitthvað af sínum uppáhalds lögum. Á plötunni eru verk eftir háklassísk tónskáld eins og Johann Sebastian Bach og Franz Schubert, en einnig eiga þeir Leonard Cohen og Eric Clapton sérstök aukalög á plötunni. Lögin eru ýmist flutt á frummálinu, eða á enskri tungu.
 

 

Þekkt verk í nýjum búningi

Meðal nýjunga er nýr enskur texti við Ave Maríu Kaldalóns. „Mér fannst kominn tími til að við deilum þessari einstöku perlu líka með umheiminum og finnst vel hafa tekist með textagerðina hjá meistaranum Friðriki Erlingssyni" segir Jóhann Friðgeir. Önnur verk á plötunni eru Panis angelicus eftir C.Franck, Ave Maria eftir F.Scubert, Faðir vor eftir Marlotte, Næturljóð eða Tristezze eftir F.Chopin og t.d. Pie Jesu eftir A.L. Webber sem Jóhann syngur ásamt sópransöngkonunni Grétu Hergils. Einnig er lagið Solo Amore / Air on the G string eftir J.S. Bach sungið. „Fólk er nú ekki vant að heyra Air eftir Bach sungið, en þetta er meiriháttar lag og gríðarleg áskorun að syngja" segir Jóhann Friðgeir sem þessa dagana syngur aðalhlutverkið, Hertogann af Mantova í Rigoletto, alltaf fyrir fullu húsi í Íslensku óperunni. 

 

Margt spennandi framundan

Þegar sýningum lýkur á Rigoletto taka ekki við nein rólegheit, því allan desember mun hann syngja yfir 30 tónleika með Frostrósum um land allt. „Það er greinilegt að landsmenn ætla að gera vel við sig á aðventunni því miðasalan hefur aldrei verið betri, enda hlakka ég til að fara hringinn. Þetta verður mikil stemming eins og alltaf þegar Frostrósir eiga í hlut" segir Jóhann Friðgeir.

 

Sacred Arias kemur út 15. nóvember. „á afmælisdegi móður minnar" segir þessi ástsæli tenórsöngvari að lokum og brosir.

 

 

 

 

 

 

Til baka