Fréttir

Regína Ósk... um gleðileg jól er fyrsta jólaplata þessarar ástsælu söngkonu

Skráð þann 6. nóvember 2010 kl. 21:10
„Þetta er úrval minna eftirlætis jólalaga en þau eru reyndar mörg því ég er mikið jólabarn" segir Regína Ósk. „Það gæti kannski einnig verið vegna þess að ég hef gengið með þessa plötu lengi" segir Regína Ósk sem reyndar er einnig búin að vera í fæðingarorlofi síðustu mánuði. „Já, ætli það sé nokkur tilviljun að þetta fer saman" segir hún hlæjandi. „Jólin eru árstíð minninganna, frá því við vorum börn og ætli maður komist ekki í enn meiri tengsl við barnið í sjálfum sér þegar maður er með kornabarn á arminum?" segir Regína Ósk.
 

 

Mörg járn í eldinum 

Regína Ósk mun í beinu framhaldi af útgáfunni fara á flug með Frostrósum því hún er í hópi þeirra flytjenda sem fara um landið og færa landsmönnum jólin í tónum. „Tónleikarnir hafa aldrei verið fleiri og aðsóknin frábær. Mér skilst að uppselt sé á yfir 20 tónleika" segir hún. „Ég hlakka bara til eins og sannkölluðu jólabarni sæmir" segir hún brosandi.

Regína Ósk hélt vinsæla söngskemmtun með tónlist Carpenters systkinanna í Salnum í Kópavogi í haust og mun hún taka upp þráðinn aftur á nýju ári. „Salurinn fylltist 8 sinnum, svo ég sé mig tilneydda til að bjóða upp á nokkra tónleika til viðbótar til að svara eftirspurninni" segir hún. „Þetta er bara eins og með Frostrósirnar, selst bara allt upp" segir Regína. „Það er alltaf gaman að hafa mikið að gera og ég bara hlakka til tarnarinnar framundan, að kynna nýja jóladiskinn og halda svo í hringferð um landið með Frostrósunum".

 

Regína Ósk ...um gleðileg jól kemur út 12. nóvember.

Til baka